|
Николай Елисеевич Уляшев 19.12.1927–?
«Книга памяти Республики Коми», том 8, стр. 282
Николай Елисеевич Уляшев – Ме чужи Вöльдiнын 1927-öд вося декабр 19-öд лунö ыджыд семьяын. Помалi 5 класс. Война йылысь тöдмалi гортын. Водзö велöдчыны эз вöв возможность. 1942–1943-öд воясö лэдзи вöр, тулыснас кылöдi пур, гожöмнас – колхозын ылыс видзьяс вылын пукті турун. Вöрпунктын уджалiгöн велöдiсны всеобуч (всесоюзное воинское обучение). Векджык занятиеясыс вöвлiсны Бадьёльйылын субöта-воскресенньӧясö. Кайлывлiм пекнича рытсянь: бöрсö волім подöн ли, вöлöн ли. Армияö мобилизуйтiсны 1944-öд воын, кор мем эз тыр на весиг 17 арöс. Ме сэки кыйси Войвожын, Тима керкаын. Удитi вöр-ватi собавны, мирнöй сынöдсö бöръяысь лолавны кык вежон. Лыйи сё ур. Кайлiс ме дорö вöлöн мамö. Кык лун олi гортын, коймöд лунсö лэччи Кулöмдiнö, военкоматö. Туйяс абуöсь. Быдса тöлысь ковмис сэн овны, военнöй делöö велöдчыны. Сэсся подöн лэччим Сыктывкарö, сэсянь сiдз жö – Айкатылаöдз. Сэнi миянöс пуксьöдiсны теплушкаясö, нуисны Княжпогостöдз. Княжпогостын пывсьöдiсны, сетiсны сухой паёк, анькытша концентрат пачкаяс, 300 грамм нянь (сукар) сутки кежлö, кык яя консерв банка. Сэсянь Вологдаöдз бара нуисны теплушкаясын. Кык тöлысь велöдчöм бöрын мунiм Няндомаö. 1945-öд вося майын мöдöдiсны НКВД-лöн частьясö видзны промышленнöй объектъяс, кöрт туй посъяс, водокачкаяс. Миян 87-öд полкын унджыкыс вöлiны комияс: командование эскис комияслöн ылӧдчытӧмлун, вын да нинöм вылö ньöбны позьтöмлун вылö. А война вот-вот должен помасьны. Победа паныдалiм Соть ю дорын. Фронт вылын эг вöв. Судитлiсны эз сöмын фронт вылысь, но и фронт вылö пышйысьяссö военнöй трибуналöн, кыдзи дезертирöс. Татшӧмъясыс вӧліны, а ме эг лысьт пышйыны. Буй – Данилов – Шаря (Вологда дор) туй костын служитi сопровождающöйöн. Сэсся ыстiсны Рытыввыв Украинаö националистъяскöд тышкасьны. И кöтасьлiм, и кынмывлiм, и тшыгъявлiм Львов, Тернополь да Ивано-Франковскöй обласьтъяс гöгöрса вöръяс кытшлалiгӧн. Быдторйыс вöвлiс, некор эг кужöй виччысьны, кодар боксянь воас смерть, уна ёрт пöгибнитiс. Демобилизуйтчи сöмын 1951-öд вося май 14-öд лунö. Пыри служитны милицияö Поточаны сиктö. Меным сетiсны дас нёль «ястребокöс». Сьöкыд вöлi тышкасьны оуновецъяскöд (бандеровецъяскöд). Найö эз жалитны ни челядьöс, ни нывбабаясöс. Виисны и миян КГБ-са старшöй лейтинант Стороженкоöс. Ми тышкасим бандитъяслы отсасьысьяскӧд, гусясьысьяскöд, видзим колхознöй эмбур, кытшлалім гӧгӧр войясын. Миян «ястребокъяслöн» вöлiны немецкöй винтовкаяс, а менам ППШ автомат, патрона дискъяс, пистолет сы дорö 32 патрон, кык «Ф-1» граната. Сьöкыд вöлi, ог дзеб. Бандеровецъяс терроризируйтiсны йӧзсӧ, бырöдалiсны активистъясöс быдса семьяясӧн. Медбöръя бандбоевикъяссö, дас öти мортöс, вöлi бырöдöма сöмын 1953-öд воын. 1978-öд вося урасян тöлысьö петi пенсия вылö дзоньвидзалун омöльтчöм вöсна, старшöй лейтенант званиеöн. Милицияын уджалiгöн велöдчи рытъя школаын. Помалi шöр да милицейскöй школаяс. Война дырйи эг ранитчыв, а бöрас чеглiсны вит ордлы, вöрзьывлiс юр вем. Эм «За Победу над Германией в Великой Отечественной войне 1941–1945 гг.», «30 лет Советской армии», «50 лет советской милиции», «За безупречную службу» да юбилейнöй мукöд медальяс, «Ветеран труда» да «Отличник милиции», «Специалист 3-го класса» морöсвывса пасъяс. Нелямын гöгöр грамота, диплом да ошкана письмö. Маша, Дима, Юля (чожöн шуысьяс – П.А.), бура велöдчöй. Аттьö, мый он вунöдöй ассьыныд рöдвужтö, пыдди пуктанныд войнавывса да тылса геройясöс! Пöсь чолöмöн тiян дорö Украинаса обласьтса Бережаны Тернополь карын олысь коми морт Николай Елисеевич. Вöльдiн школаса велöдчысьяслы письмöысь
Материал предоставлен Вольдинской библиотекой |
